Горад, нават, больш падпаў пад расейскі маргінальны ўплыў, чым Віцебск. Пануе брутальны культ сілы. Брыгады маладзёнаў па 5-10 чалавек шпацыруюць па вячэрніх вуліцах, шукаючы выпіўкі і прыгодаў. І тое, і другое звычайна знаходзяць. І маліся, абываталь, каб "ваўкі" не абралі ахвяраю цябе... Можна сказаць, што нацыыянальна-вызвольная БПС і, асабліва, баявая арганізацыя "Самаабарона" супрацьстаяць ваяўнічаму плебсу.

Звычайнай акцыяй БПС у горадзе зьяўляюцца вулічныя "тратуарныя" шэсьці са значкамі, бяз сьцягоў, але са сьпевамі:"Мы - партызаны, лясныя браты", традыцыйна разбаўленыя: "Да барацьбы! Да перамогі!", "Рэвалюцыя! Свабода!". Такія спэцыфічныя магілёўскія формы змаганьня знаходзяць разуменьне ў жыхароў. Ва ўсялякім выпадку вулічныя хуліганы апасаюцца зьвязвацца з нацыяналістамі. Небясьпеку пазіцыям рэжыму адчуў мясцовы КДБ, які ў рэгіёнах на парадак дурнейшы й больш прамаскоўскі. Адданыя служакі дайшлі да таго, што ў Магілёўскім Дзяржаўным Унівэрсытэце завялі практыку "стучаць" прафесарам на студэнтаў і наадварот. А таксама шлюць фармуляры ў рэктарат аб неблаганадзейных студэнтах-нацыяналістах і дэмакратах.

Барацьба з расейскім фашызмам

Іншым крокам КДБ стала аднаўленьне ў горадзе РНЕ, НБП. "Русское Национальное Единство", пераможанае беларускімі патрыётамі ў 1999-2000 гг., цяпер ізноў інсьпіруецца КДБ-ФСБ для новых апэрацыяў напярэдадні выбараў. Яшчэ два гады таму самая моцная філія НБП (Национал-Большевистская Партия) была ў Магілёве. Але лімонаўцы атрымалі шчыльны адпор. Цяпер НБП у глыбокім падпольлі, толькі зрэдку "соратники" вылазяць на нефармальныя канцэрты, дзе пьюць "чарніла" ды малююцца сярпаста-малаткастымі навязкамі. Аднак, з паяўленьнем сяброў САБ ці БПС навязкі адразу здымаюцца. Па словах сябраў БПС, НБП у горадзе ўжо не было б, калі б не ваяжоры зь Менску. Адным з галоўных важакоў НБП зьяўляецца нейкі лысы па мянушцы "Эвертан", ашываецца сярод футбольных фанаў "Дынама" (Мн) разам з РНЕшнікамі, найбольш муціць ваду.

Агульны ўплыў НБП нязначны, але пакідаць па-за ўвагай расейскіх бальшавічкоў нельга. Стратэгічная лінія гэтай групоўкі, якая ідзе з Масквы - гэта агрэсія ў бок маладых дзяржаў колішняга СССР (Беларусь, Украіна, Латвія, Казахстан - у зоне першае агрэсіі НБП). Пакуль дэмакратычная грамадзкасьць разводзіць рукамі, сябрам БПС прыходзіцца плаціць дарагім коштам за свабоду нашых гарадоў ад вулічнай фашыстоўскай швалі. На вагу пастаўленыя лёсы й душы моладзі, а, значыць, і будучыня Радзімы. За гэта можна і патрэбна змагацца! Канешне, калі тыя ж АГПшнікі ў Магілёве дапамагалі б БПС, было б прасьцей, але ці часта АГП бывае на баку беларускіх патрыётаў?.. Баявікі РНЕ зьбіраюцца ў цэнтры горада ня тоячыся.

Філію РНЕ адрадзілі два адмарозкі, прысланыя са Шклова - "Маршал" і "Лёха". Скураныя курткі, паголеныя галовы, цёмныя акуляры, пахадняк у стылі "я качок", а таксама нязграбнасьць ды інтэлектуальная недаразьвітасьць, памножаная шматзначнымі рыкамі пітэкантропаў - пазнавальны фармат лідараў РНЕ. Здымаецца зала для трэніровак, ёсьць нейкая "хата". Адкуль грошы - таямніца. КДБ і міліцыя, якія так спраўна сочаць за беларускімі нацыяналістамі, тутака чамусьці цалкам бездапаможныя...

РНЕшнікі ў горадзе распісваюць сваёй абрэвіятурай дамы й платы, клеяць свае ўлёткі. Вядома, што кіраўніцтва горада загадала муніцыпальным службам Магілёва зрываць улёткі БПС і Маладога Фронту, але не чапаць РНЕшныя. Гэтым займаюцца звычайныя грамадзяне. Натуральна, сябры Партыі Свабоды й САБ аддаюць перавагу асьветніцкай працы з "тупагаловымі", але ўспрымаецца гэта як слабасьць. Таму, як гаворыцца ў нашым народзе: "дурня й у царкве бьюць". На вайне, як на вайне...

Калі ў Менску йснуе нейкі ціск прэсы, грамадзкасьці, то ў крымінальным Магілёве - поўны «беспредел» мянтоў. Мясцовыя "ахоўнікі парадку" не падступяцца да бандаў хуліганаў, але з асаблівай жорсткасьцю распраўляюцца з беларускімі патрыётамі. У часе акцыі расклейкі ўлётак БПС, супрацоўнікі Ленінскага РАУС горада захапілі сябра БПС сп. Жэка. Над хлапцом зьдзекваліся люта, пагражалі, білі, бралі «на понт», маўляў "у цябе крадзеная куртка, сядзеш на 5 год, калі не скажаш колькі вас у горадзе". Хлопец паспрабаваў згуляць ,сказаў, што "ўлёткі даў нейкі дзядзька ды за 1000 рублёў папрасіў паклеіць" - "вось ты, фашыст, Радзіму за тысячу рублёў прадаеш?!" - "гэта вы прадалі яе маскалям разам са сваім паханом-халуём" - быў мужны адказ патрыёта. Ізноў білі - дзесяць сутак хлопец ня мог аправіцца, балелі ныркі, пляваўся крывёю.

Не на шмат ад міліцыі адышло кіраўніцтва горада на чале з Шорыкавым. Граданачальнік праславіўся атакай супраць герба горада, на якім рыцар у браме й Пагоня. Герб (сымбаль вернасьці й служэньня Радзіме) быў нададзены гараджанам урадам Рэчы Паспалітай за нескаронасьць перад маскоўскімі агрэсарамі. 1.ІІ.1667 магілёўцы, пасьля працяглай акупацыі, сваімі сіламі выразалі маскоўскі гарнізон і здабылі свабоду гораду. Гэтае паўстаньне стала адным з сымбаляў барацьбы за свабоду, і, неўзабаве, Беларусь была вызваленая. Цяперашняе гарадзкое начальства аздабляе горад, як "вотчыну прэзыдэнта", праўда затрымлівае заробкі людзям. Горад вядомы самым прарасейскім цэнтрам - катэдра гісторыі Расеі пры МДУ ім. Куляшова. Запраўляе катэдрай А.Варабьёў - вядомы сьляпой нянавісьцю да ўсяго беларускага, сярод студэнтаў мае мянушку "Гімлер". "Гімлер" і кампанія спраўна лабіруюць самыя адыёзныя праекты Міністэрства адукацыі, прапануючы ўвогуле вывесьці з падручнікаў гісторыю беларусаў. Па Магілёву надта відаць, што адбываецца ў Беларусі. Ці гэта не праява акупацыі? Нашае вялікае шчасьце, што ёсьць людзі, якія змагаюцца з гэтай сістэмай, ратуючы права беларусаў жыць на гэтай зямлі. І можна толькі захапляцца мужнасьцю герояў, якія ў часе такой цемры для краіны маюць сілу й волю паўстаць на ўладу Зла.

Але ж Нацыю твораць героі.